A mund të më ndihmoni ju lutem për të kuptuar Filipianëve kapitulli 1, vargjet 15-18?

Pyetje & Përgjigje

Përgjigjur nga Dave Hunt

PYETJE: A mund të më ndihmoni ju lutem për të kuptuar Filipianëve kapitulli 1,
vargjet 15-18: «Disa me të vërtetë shpallin Krishtin edhe për smirë dhe për
grindje, por disa me vullnet të mirë. Këta e shpallin Krishtin për grindje, jo çiltas,
duke menduar që t'u shtojnë shtrëngime vargonjve të mi; kurse ata e bëjnë nga
dashuria, duke ditur se unë jam vënë për mbrojtjen e ungjillit». Duket sikur kjo i
hap rrugën kujtdo që «përmend emrin e Jezusit».

PËRGJIGJE: Pali, i cili i paralajmëroi shumë qartë korintasit kundër pranimit të një
«Jezusi tjetër» (2 Korintasve 11:4) të cilin ai nuk e kishte shpallur, nuk po i jepte
leje askujt që predikon një Krisht të rremë. Jo, shqetësimi i Palit këtu ishte motivi i
zemrës së atyre që shpallnin Jezusin biblik. Disa ishin ziliqarë për të krishterët e
tjerë dhe/ose shërbesat e tyre. Edhe pse i mëritur, mesazhi i tyre për Jezus
Krishtin ishte besnik ndaj Fjalës së Perëndisë. Megjithatë, në metodën e tyre të
shërbimit, ata e akuzuan Palin apo të tjerë që po u kushtoheshin më shumë
vëmendje, për të cilët kishte konsiderata më të larta, ose që ndiqeshin nga një
grup më i madh etj.

Qëndrimi i atyre që e shpallnin «Krishtin për grindje, jo çiltas» përfshinte ambicie
egoiste. Ata jo vetëm që u gëzuan përbrenda për burgosjen e Palit në Romë, por
shkuan deri atje sa nënkuptuan se burgosja e tij ishte disi faji i tij, duke u
përpjekur kështu që ta diskreditonin atë në mes të mbështetësve të tyre si dhe
atyre të Palit.

Pali, megjithatë, edhe pse ai i qortoi shpesh individët dhe shërbesat që po
shmangeshin nga e vërteta e Fjalës së Perëndisë, e konsideroi të një rëndësie
supreme shpalljen e Krishtit sipas së vërtetës. Dashuria e tij për Krishtin dhe
ungjillin i tejkaloi vuajtjet e tij—veçanërisht, pikëllimet e shkaktuara nga të
krishterët ziliqarë—e megjithatë, përmes hirit të Perëndisë ai mund të shpallte:
«Krishti shpallet; dhe për këtë gëzohem, dhe madje do të gëzohem».